ताज्या घडामोडी
पारंपरिक वाद्यसंस्कृतीला नवा आयाम – प्रियदर्शनी क्रीडा मंडळाची भव्य ढोल-ताशा स्पर्धा पो.नि. शरद जोगदंड : “अंबाजोगाईचा ढोल राज्यभर प्रसिद्ध होईल”
अंबाजोगाई (प्रतिनिधी) : सध्याच्या काळात सर्वत्र डॉल्बीच्या गोंगाटाने पारंपरिक वाद्य संस्कृती हरवते आहे. मात्र या पारंपरिक परंपरेला नवजीवन देण्याचे कार्य प्रियदर्शनी क्रीडा व सांस्कृतिक मंडळ सातत्याने करत आहे. ढोल-ताशा पथक स्पर्धेद्वारे या संस्कृतीला व्यासपीठ मिळत असून तरुणाईत नवा उत्साह निर्माण होत आहे, अशी भावना अंबाजोगाई शहर पोलीस ठाण्याचे पोलीस निरीक्षक शरद जोगदंड यांनी व्यक्त केली. प्रियदर्शनी क्रीडा सांस्कृतिक व व्यायाम मंडळाच्या वतीने आयोजित भव्य ढोल-ताशा पथक वाद्य स्पर्धेच्या उद्घाटनप्रसंगी ते प्रमुख पाहुणे म्हणून बोलत होते. मान्यवरांची उपस्थिती कार्यक्रमाच्या व्यासपीठावर आयोजक संकेत राजकिशोर मोदी यांच्यासह पोलीस निरीक्षक कांबळे, लोकमतचे अविनाश मूडेगावकर, ‘आधार माणुसकी’चे अॅड. संतोष पवार, मनोज लखेरा, राष्ट्रवादी काँग्रेसचे शहराध्यक्ष महादेव आदमाणे, माजी नगरसेवक अमोल लोमटे, दिनेश भराडिया, सुनील वाघाळकर, पंडित हुलगुंडे, सय्यद रशीद, शाकीर काझी, विजय रापतवार, खलील जाफरी, भीमसेन लोमटे, माणिक वडवणकर, राम घोडके आदी मान्यवर उपस्थित होते. स्पर्धेची सुरुवात व उद्देश श्रीगणेश पूजन, वाद्यपूजन व नारळ फोडून या स्पर्धेला प्रारंभ झाला. आयोजक संकेत मोदी यांनी आपल्या प्रास्ताविकात मंडळाच्या कार्याचा आढावा घेतला. ते म्हणाले, “अंबाजोगाई शहर शैक्षणिक, सांस्कृतिक आणि सामाजिक परंपरेसाठी ओळखले जाते. प्रियदर्शनी मंडळाने गेली अनेक वर्षे समाजहिताचे उपक्रम राबवून शहराचे वैभव वाढवले आहे. २०२३ साली सुरू केलेल्या या स्पर्धेला मिळालेला उत्स्फूर्त प्रतिसाद आमच्यासाठी प्रेरणादायी आहे. २०२५ मधील हा तिसरा पर्व अधिक भव्य आणि ऐतिहासिक आहे. या स्पर्धेमागचा उद्देश म्हणजे वाद्यप्रेमींना योग्य व्यासपीठ मिळावे व त्यांची कला पुढे जावी हा आहे.” संकेत मोदी यांनी ढोल-ताशा ही स्पर्धा खेळाचा एक प्रकार असून त्यातून मनोरंजनाबरोबर व्यायाम व नशामुक्तीचा संदेशही दिला जातो, असेही नमूद केले. पाहुण्यांचे मनोगत अॅड. संतोष पवार यांनी आपल्या मनोगतात समाजोपयोगी उपक्रमांना शुभेच्छा दिल्या. तर प्रमुख पाहुणे पो.नि. शरद जोगदंड म्हणाले, “नाशिक ढोल महाराष्ट्रात जसा प्रसिद्ध आहे, तसाच लवकरच अंबाजोगाईचा ढोलही राज्यभर गाजेल. डॉल्बीच्या गोंगाटातही प्रियदर्शनी मंडळ पारंपरिक वाद्य संस्कृती जोपासत आहे ही अभिमानास्पद बाब आहे. ढोल-ताश्यांचा आवाज अंगावर रोमांच उभे करतो आणि माणसाला तल्लीन करून टाकतो. अशा स्पर्धांमुळे वादकांना मोठे व्यासपीठ मिळते. राजकिशोर मोदी व संकेत मोदी यांनी हे कार्य सातत्याने सुरू ठेवावे.” स्पर्धक व परीक्षक या स्पर्धेत मुला-मुलींसह अनेक संघ सहभागी झाले होते. लहानग्या कलाकारांपासून अनुभवी वादकांपर्यंत सर्वांनी जोशपूर्ण सादरीकरण केले. स्पर्धेचे परीक्षण छत्रपती संभाजीनगर येथील शरद दांडगे, शुभम सिरसाळकर, चिन्मय कुलकर्णी व अथर्व देशपांडे यांनी केले. स्पर्धा यशस्वी करण्यासाठी संकेत मोदी मित्रमंडळाच्या सर्व सदस्यांनी परिश्रम घेतले.
