ताज्या घडामोडी
दळवी डिजिटल स्कूल, हॉस्टेल व क्रिकेट अकॅडमीचा आषाढी एकादशी निमित्त आगळावेगळा उपक्रम; विद्यार्थ्यांच्या दिंडीने मोरेवाडी परिसर भक्तिमय
अंबाजोगाई (प्रतिनिधी): आषाढी एकादशीच्या पावन निमित्ताने दळवी डिजिटल स्कूल, हॉस्टेल व क्रिकेट अकॅडमीच्या वतीने विद्यार्थ्यांसाठी एक आगळावेगळा आणि संस्कारमय उपक्रम आयोजित करण्यात आला. विद्यालयातील विद्यार्थ्यांनी भगवान विठ्ठल, रुक्मिणी तसेच वारकरी संप्रदायातील विविध संतांच्या वेशभूषेत सहभागी होत पारंपरिक दिंडी काढली. या दिंडीमुळे मोरेवाडी परिसर संपूर्णपणे भक्तिमय वातावरणाने भारावून गेला. विद्यार्थ्यांमध्ये भारतीय संस्कृती, वारकरी परंपरा आणि आषाढी वारीचे महत्त्व रुजावे, तसेच त्यांच्या सुप्त कलागुणांना योग्य व्यासपीठ मिळावे, या उद्देशाने हा उपक्रम राबविण्यात आला. टाळ-मृदुंगाच्या गजरात, विठ्ठलाच्या नामस्मरणात आणि अभंगांच्या सुरावटीत विद्यार्थ्यांनी साकारलेली दिंडी नागरिकांसाठी आकर्षणाचा केंद्रबिंदू ठरली. दळवी डिजिटल स्कूल हे केवळ गुणवत्तापूर्ण शिक्षणच नव्हे, तर विद्यार्थ्यांच्या सर्वांगीण विकासासाठी सातत्याने विविध सांस्कृतिक, शैक्षणिक आणि क्रीडा उपक्रम राबवत आहे. विद्यार्थ्यांमधील आत्मविश्वास, नेतृत्वगुण, कला आणि संस्कार जोपासण्यासाठी विद्यालय सातत्याने प्रयत्नशील असून, अनेक विद्यार्थी विविध स्पर्धांमध्ये उल्लेखनीय यश मिळवत विद्यालयाचे नाव उज्ज्वल करत आहेत. आषाढी एकादशीच्या निमित्ताने आयोजित केलेल्या या दिंडीचे नागरिक आणि पालकांनी मनापासून कौतुक केले. अशा संस्कारक्षम आणि विद्यार्थीकेंद्री उपक्रमांमुळे दळवी डिजिटल स्कूल, हॉस्टेल व क्रिकेट अकॅडमीने अंबाजोगाई शहरात आपली वेगळी ओळख निर्माण केली असून, पालकांचा विश्वास आणि विद्यार्थ्यांचा वाढता प्रतिसाद हेच त्याचे यश असल्याचे यावेळी दिसून आले.
